लोकतंत्र मिरर
नागपूर, सतीश तोडासे (प्रतिनिधी) : सरस्वती विद्यालय माध्यमिक आणि कनिष्ठ महाविद्यालय, शंकर नगर, नागपूर येथे १३ ऑक्टोबर २०२६ रोजी ‘लायब्ररी नेक्स्ट २०२६’ या ग्रंथपाल संमेलनाचे आयोजन करण्यात आले. विद्यार्थ्यांमध्ये वाचनाची आवड निर्माण करणे, ग्रंथालयातील साधनसंपत्तीचा प्रभावी वापर करण्यास प्रोत्साहन देणे आणि विद्यार्थ्यांच्या जीवनातील पुस्तकांचे महत्त्व अधोरेखित करणे हा या कार्यक्रमाचा मुख्य उद्देश होता.
कार्यक्रमाची सुरुवात सौ. रुपाली बक्षी यांच्या प्रार्थनागीताने झाली. मुख्याध्यापिका डॉ. रेश्मी उमेश यांनी स्वागतपर भाषण केले. कार्यक्रमाच्या प्रमुख पाहुण्या धरमपेठ कला व वाणिज्य महाविद्यालयाच्या ग्रंथालय विभागातील सहाय्यक प्राध्यापिका डॉ. मंजू दुबे यांच्या हस्ते कार्यक्रमाचे उद्घाटन करण्यात आले. यावेळी त्यांनी ज्ञानाचा प्रसार करण्यासाठी आणि विद्यार्थ्यांमध्ये वाचनसंस्कृती रुजविण्यासाठी ग्रंथपालांची भूमिका अत्यंत महत्त्वाची असल्याचे प्रतिपादन केले. सुमारे २७ शाळांमधील ग्रंथपालांच्या व्याख्यानांसाठी व सादरीकरणांसाठी आवश्यक नियम व अटींची माहिती सौ. शुभांगी उईके आणि सौ. हिना खरवडे यांनी दिली. शाळेच्या वतीने सौ. वैशाली जगताप यांनी माहितीपूर्ण व्याख्यान सादर केले. आकर्षक पॉवरपॉइंट सादरीकरणामुळे त्यांच्या व्याख्यानाला विशेष रंगत आली.
या कार्यक्रमाला साऊथ इंडियन एज्युकेशन सोसायटीचे अध्यक्ष श्री. टी. के. वेंकटेश, सचिव सौ. व्ही. मीनाक्षी, सहसचिव डॉ. सुरेश चारी, खजिनदार श्री. आर. गणेश तसेच सोसायटीचे सदस्य श्री. आर. कुमार, श्री. राधाकृष्णन आणि श्री. प्रकाश मुदलियार यांची प्रमुख उपस्थिती लाभली. याशिवाय एडीसीचे समन्वयक श्री. एस. प्रभुरामन, श्री. रवींद्र कुलकर्णी, उपमुख्याध्यापिका सौ. शैली अय्यर, पर्यवेक्षक श्री. राहुल घोडे आणि श्री. शैलेंद्र ठाकूर तसेच पूर्वप्राथमिक व मॉन्टेसरी विभागाच्या प्रमुख सौ. वीणा नारायणन उपस्थित होते. कार्यक्रमाचे सूत्रसंचालन सौ. रश्मी नायर आणि सौ. सुषमा बघेल यांनी केले. शाळेच्या ग्रंथपाल सौ. राधा मानकर यांनी आभारप्रदर्शन केले. कार्यक्रम यशस्वी करण्यासाठी श्री. अंकित पेंडलवार, श्री. रोहित शिंदे, कु. संयुक्ता गुप्ता आणि सौ. अनघा पेंडके यांनी मोलाचे सहकार्य केले. हे ग्रंथपाल संमेलन अत्यंत फलदायी ठरले. या उपक्रमामुळे ग्रंथपालांमधील सहकार्याची भावना अधिक दृढ झाली. तसेच ज्ञानाचा प्रसार, वाचनाची सवय आणि विद्यार्थ्यांच्या सर्वांगीण विकासासाठी ग्रंथालयांचे असलेले महत्त्व पुन्हा एकदा अधोरेखित झाले.
