लोकतंत्र मिरर
पुणे : नसरापूर येथे अल्पवयीन मुलीवर लैंगिक अत्याचार करून तिची हत्या केल्याच्या गाजलेल्या प्रकरणातील आरोपी भीमराव कांबळे याच्या शिक्षेबाबतचा अंतिम निकाल आज पुणे सत्र न्यायालयात जाहीर होणार आहे. त्यामुळे या खटल्याकडे राज्यभराचे लक्ष लागले असून न्यायालय परिसरात कडेकोट पोलीस बंदोबस्त तैनात करण्यात आला आहे.
विशेष न्यायाधीश एस. आर. साळुंखे यांच्या न्यायालयात सकाळी ११ वाजता सुनावणी सुरू होणार आहे. निकाल जाहीर करताना न्यायालय आरोपीला कोणती शिक्षा सुनावली जाते, तसेच त्या शिक्षेमागील कारणमीमांसाही सविस्तर मांडणार आहे.सुनावणीदरम्यान पुणे ग्रामीण पोलिसांकडून आरोपीला न्यायालयात हजर करण्यात येणार आहे. पीडित चिमुरडीच्या कुटुंबीयांना न्यायालयात उपस्थित राहण्याची विशेष परवानगी देण्यात आली असून, विशेष सरकारी वकील अॅड. अजय मिसर यांच्यासह दोन्ही बाजूंचे वकीलही उपस्थित राहणार आहेत.
दरम्यान, न्यायालय परिसरात पीडितेला न्याय मिळावा, अशी मागणी करणारे फलक झळकले आहेत. सामाजिक कार्यकर्ते आणि नागरिक मोठ्या संख्येने न्यायालयाबाहेर जमले असून, या प्रकरणाच्या निकालाबाबत सर्वांच्याच नजरा न्यायालयाकडे लागल्या आहेत.१ मे रोजी नसरापूर परिसरात घडलेल्या या घटनेने संपूर्ण राज्याला हादरवले होते. अल्पवयीन मुलीवर अत्याचार करून तिची हत्या झाल्याची माहिती समोर आल्यानंतर पोलिसांनी तातडीने तपास करून आरोपीला अटक केली होती. आता या बहुचर्चित प्रकरणात आरोपीला फाशीची शिक्षा होते की जन्मठेप, याचा निर्णय आज न्यायालयाकडून स्पष्ट होणार आहे.
