लोकतंत्र मिरर
विदर्भ/मराठवाडा : विदर्भ, मराठवाडा आणि मुंबईदरम्यान प्रवास करणाऱ्या रेल्वे प्रवाशांसाठी दिलासादायक बातमी आहे. मुंबई-बल्लारशाह-मुंबई नंदीग्राम एक्स्प्रेस (11001/11002) मध्ये आता अत्याधुनिक LHB (लिंक हॉफमन बुश) कोच जोडण्याचा निर्णय रेल्वे प्रशासनाने घेतला आहे. त्यामुळे प्रवाशांचा प्रवास अधिक सुरक्षित, आरामदायी आणि सुखकर होणार आहे.
नंदीग्राम एक्स्प्रेस ही विदर्भ, मराठवाडा आणि मुंबईला जोडणारी महत्त्वाची रेल्वे सेवा मानली जाते. या मार्गावर दररोज मोठ्या संख्येने प्रवासी प्रवास करतात. आतापर्यंत या गाडीत जुन्या आयसीएफ डब्यांचा वापर केला जात होता. मात्र, आता LHB कोचचा समावेश झाल्याने प्रवाशांना अधिक चांगल्या सुविधा मिळणार आहेत.LHB कोच हे आधुनिक तंत्रज्ञानावर आधारित असून त्यामध्ये धक्के आणि आवाज कमी जाणवतात. तसेच अपघाताच्या वेळी हे डबे अधिक सुरक्षित मानले जातात. त्यामुळे प्रवाशांच्या सुरक्षेसह प्रवासाचा दर्जाही उंचावणार आहे.
नंदीग्राम एक्स्प्रेसमध्ये LHB कोचचा समावेश व्हावा यासाठी विविध स्तरांवर पाठपुरावा करण्यात येत होता. अखेर रेल्वे प्रशासनाने या मागणीची दखल घेत गाडीचे LHB कोचमध्ये रूपांतर करण्याचा निर्णय घेतला. रेल्वेच्या या निर्णयाचे प्रवाशांकडून स्वागत करण्यात येत असून, विदर्भ आणि मराठवाड्यातील नागरिकांनी समाधान व्यक्त केले आहे.
रेल्वे प्रशासनाच्या माहितीनुसार, 17 जूनपासून बल्लारशाह येथून नंदीग्राम एक्स्प्रेस LHB कोचसह धावणार आहे. त्यामुळे मुंबईकडे जाणाऱ्या प्रवाशांना आता अधिक सुरक्षित आणि आरामदायी प्रवासाचा अनुभव मिळणार आहे.
