लोकतंत्र मिरर
अहिल्यानगर. राधेशाम कुलकर्णी (अहिल्यानगर जिल्हा प्रमुख) दिवाळीची सुट्टी म्हणजे मुलांसाठी आनंद, उत्साह आणि धमाल करण्याची पर्वणी. मात्र, सध्याच्या डिजिटल युगात मुलांचा बहुतांश वेळ मोबाईल, टीव्ही आणि व्हिडिओ गेममध्ये जात आहे. त्यामुळे यंदाच्या दिवाळीत पालकांनी मुलांना मोबाईलपासून दूर ठेवून वाचन, चित्रकला, गोष्टी आणि विविध सर्जनशील उपक्रमांची गोडी लावावी, असे आवाहन सामाजिक कार्यकर्ते व कर सल्लागार अतुल प्रकाश बोऱ्हाडे यांनी केले आहे.
दिवाळीच्या सुट्टीचा उपयोग मुलांच्या व्यक्तिमत्त्व विकासासाठी करता येऊ शकतो. मुलांना गोष्टींची पुस्तके, बालसाहित्य, पंचतंत्राच्या कथा, शिवचरित्र आणि निसर्गविषयक पुस्तके वाचायला द्यावीत. दररोज किमान अर्धा ते एक तास वाचनासाठी राखून ठेवल्यास मुलांची कल्पनाशक्ती, भाषाज्ञान आणि शब्दसंपत्ती वाढण्यास मदत होईल.
मुलांना रंग, पेन्सिल, क्रेयॉन्स आणि स्केचपेन देऊन चित्रकलेची आवड निर्माण करावी. दिवाळीनिमित्त आकाशकंदील, रांगोळी आणि पणत्यांची चित्रे काढण्यास प्रोत्साहन द्यावे. यामुळे मुलांच्या सर्जनशीलतेला चालना मिळेल.
संध्याकाळी संपूर्ण कुटुंबाने एकत्र बसून गोष्टी सांगण्याचा उपक्रम राबवावा. मुलांना ऐतिहासिक कथा, महापुरुषांचे जीवनकार्य आणि संस्कारक्षम गोष्टी सांगाव्यात. मुलांनाही स्वतःच्या शब्दांत गोष्ट सांगण्याची संधी द्यावी. यामुळे त्यांचा आत्मविश्वास आणि संवादकौशल्य विकसित होईल.
मोबाईलवरील व्हिडिओ गेमऐवजी मुलांना बुद्धिबळ, कॅरम, साप-शिडी यांसारख्या खेळांकडे वळवावे. या खेळांमुळे एकाग्रता, निर्णयक्षमता आणि विचारशक्ती विकसित होण्यास मदत होते.
रंगीत कागद, कात्री आणि डिंक यांच्या साहाय्याने फुले, प्राणी, आकाशकंदील आणि विविध सजावटीच्या वस्तू बनवायला मुलांना शिकवावे. अशा उपक्रमांमुळे मुलांच्या कल्पकतेला वाव मिळतो आणि स्वतः काहीतरी तयार केल्याचा आनंदही मिळतो.
मुले ही अनुकरणातून शिकत असतात. पालकच दिवसभर मोबाईलमध्ये व्यस्त असतील, तर मुलांना मोबाईलपासून दूर ठेवणे कठीण आहे. त्यामुळे पालकांनी स्वतःही मोबाईलचा वापर मर्यादित करून मुलांसोबत वेळ घालवावा आणि त्यांच्या कलागुणांना प्रोत्साहन द्यावे.
यंदाच्या दिवाळीत मुलांना केवळ महागडी भेटवस्तू देण्यापेक्षा त्यांना पुस्तकांची भेट द्या, खेळांची गोडी लावा आणि कुटुंबासोबत आनंदाचे क्षण निर्माण करा. तंत्रज्ञानाचा योग्य वापर शिकवत मुलांच्या सुट्ट्या आनंदी, सर्जनशील आणि संस्कारक्षम बनवूया, असे आवाहन अतुल प्रकाश बोऱ्हाडे यांनी केले आहे.
