लोकतंत्र मिरर
नांदेड (जिल्हा प्रतिनिधी) : खासगी सावकारांनी वसुलीसाठी खासगी गुंडांच्या टोळ्या तैनात केल्या असून, फायनान्स कंपन्यांचे चालक ग्रामीण भागात दरमहा १० ते २० टक्के व्याजदराने पैसे वाटत आहेत. रिक्षाचालक, ट्रक-टेम्पो चालक तसेच हातावर पोट भरणाऱ्या भाजी विक्रेत्यांना छोट्या रकमा देऊन मूळ मुद्दलाच्या ५ ते १० पट रक्कम वसूल केली जात आहे. या माध्यमातून मानवी हक्कांचे उल्लंघन होत असून, अशा फायनान्स चालकांवर तातडीने कारवाई करावी, अशी मागणी शिवसेना नेते आमदार हेमंत पाटील यांनी केली आहे.
अतिव्याजाच्या वसुलीसाठी गरीब शेतकऱ्यांची घरे आणि शेतजमिनी बळकावून बॉण्डपेपरवर बळजबरीने रजिस्ट्री करून घेतली जात असल्याचेही त्यांनी सांगितले. खासगी फायनान्स कंपनीच्या कार्यालयात मृतदेह आढळलेल्या तरुण शेतकरी चंद्रकांत शिंदे यांच्या संशयास्पद मृत्यूप्रकरणी हरिद्रा केंद्राचे अध्यक्ष आमदार हेमंत पाटील यांनी पीडित कुटुंबाची भेट घेतली. यावेळी उपमुख्यमंत्री एकनाथ शिंदे यांच्या आदेशानुसार पीडित कुटुंबाला आर्थिक मदत करण्यात आली. पीडित कुटुंबाच्या पुढील आयुष्याची आणि मुलांच्या शिक्षणाची संपूर्ण जबाबदारी शिवसेना उचलेल, अशी ग्वाहीही आमदार हेमंत पाटील यांनी यावेळी दिली.
