लोकतंत्र मिरर
कमर्शियल एलपीजी (LPG) गॅस सिलेंडरच्या दरात १ जुलैपासून १८३.५० रुपयांची मोठी कपात करण्यात आल्यानंतर सर्वसामान्यांचे लक्ष घरगुती गॅस सिलेंडरच्या किमतींकडे लागले होते. मात्र २ जुलै २०२६ रोजी जाहीर करण्यात आलेल्या ताज्या दरांनुसार १४.२ किलोच्या घरगुती एलपीजी सिलेंडरच्या किमतींमध्ये कोणताही बदल करण्यात आलेला नाही. त्यामुळे घरगुती ग्राहकांना अद्याप दिलासा मिळालेला नाही.
पश्चिम आशियातील तणाव कमी झाल्यानंतर देशातील सरकारी तेल कंपन्यांनी १ जुलै रोजी १९ किलोच्या कमर्शियल एलपीजी सिलेंडरच्या दरात १८३.५० रुपयांची कपात केली. मागील काही महिन्यांत कच्च्या तेलाच्या पुरवठा साखळीवर परिणाम झाल्यामुळे इंधनासह एलपीजीच्या किमती वाढल्या होत्या. आता पुरवठा सुरळीत होत असल्याने घरगुती सिलेंडरच्या दरातही कपात होण्याची अपेक्षा व्यक्त केली जात आहे. मात्र सध्या तरी घरगुती दर जैसे थे ठेवण्यात आले आहेत.
२ जुलै २०२६ रोजीच्या दरांनुसार मुंबईमध्ये १४.२ किलोचा घरगुती एलपीजी सिलेंडर ९४१.५० रुपये तर १९ किलोचा कमर्शियल सिलेंडर २,८८५ रुपये आहे. पुण्यात घरगुती सिलेंडर ९४५ रुपये आणि कमर्शियल सिलेंडर २,९४६ रुपये दराने मिळत आहे. नागपुरात घरगुती सिलेंडरची किंमत ९९३.५० रुपये असून कमर्शियल सिलेंडर ३,१०९ रुपये आहे. कोल्हापूरमध्ये घरगुती सिलेंडर ९४४.५० रुपये आणि कमर्शियल सिलेंडर २,९०८ रुपये, नाशिकमध्ये घरगुती सिलेंडर ९४५.५० रुपये व कमर्शियल सिलेंडर २,९६१.५० रुपये, तर छत्रपती संभाजीनगरमध्ये घरगुती सिलेंडर ९५०.५० रुपये आणि कमर्शियल सिलेंडर २,९९०.५० रुपये दराने उपलब्ध आहे.
दरम्यान, १ जुलैपासून लागू झालेल्या सुधारीत दरांनुसार दिल्लीमध्ये १९ किलोचा कमर्शियल एलपीजी सिलेंडर २,९३० रुपये, मुंबईमध्ये २,८८४ रुपये, कोलकात्यात ३,०७२ रुपये आणि चेन्नईमध्ये ३,०९९ रुपये दराने उपलब्ध आहे. घरगुती सिलेंडरच्या किमती मात्र सध्या कायम ठेवण्यात आल्या आहेत.
