लोकतंत्र मिरर
मुंबई : मुख्यमंत्री माझी लाडकी बहीण योजनेच्या लाभार्थी महिलांसाठी महत्त्वाची अपडेट समोर आली आहे. जुलै महिन्याच्या ₹1500 हप्त्याची महिला आतुरतेने वाट पाहत असून, येत्या काही दिवसांत त्यांच्या खात्यात पैसे जमा होण्याची शक्यता व्यक्त केली जात आहे. राज्यातील लाखो महिलांना या योजनेअंतर्गत दरमहा ₹1500 आर्थिक मदत दिली जाते. त्यामुळे जुलैचा हप्ता नेमका कधी मिळणार, याकडे लाभार्थी महिलांचे लक्ष लागले आहे.
15 ते 18 ऑगस्टदरम्यान हप्ता मिळण्याची शक्यता
मिळालेल्या माहितीनुसार, जुलै महिन्याचा हप्ता 15 ऑगस्ट ते 18 ऑगस्ट या कालावधीत पात्र महिलांच्या बँक खात्यात जमा होण्याची शक्यता आहे. ऑगस्ट महिन्यात सण-समारंभ असल्याने हप्ता लवकर जमा होण्याची शक्यता व्यक्त केली जात आहे. मात्र, ही अधिकृत तारीख नसून सध्या उपलब्ध माहितीनुसार व्यक्त करण्यात आलेली शक्यता आहे. त्यामुळे महिलांनी अधिकृत घोषणेचीही प्रतीक्षा करणे महत्त्वाचे आहे.
हप्ता रखडला तर ₹3000 मिळणार?
जर काही तांत्रिक कारणांमुळे 18 ऑगस्टपर्यंत जुलैचा हप्ता जमा झाला नाही, तर जुलै आणि ऑगस्टचे हप्ते एकत्र मिळून ₹3000 जमा होण्याची शक्यता व्यक्त केली जात आहे. यापूर्वी 2024 मध्ये रक्षाबंधनाच्या काळात दोन हप्ते एकत्र करून काही लाभार्थी महिलांच्या खात्यात ₹3000 जमा करण्यात आले होते. त्यामुळे यंदाही हप्ता वेळेत न मिळाल्यास अशाच प्रकारे रक्कम मिळण्याची शक्यता व्यक्त केली जात आहे.
फक्त पात्र महिलांनाच मिळणार लाभ
जुलै महिन्याचा हप्ता योजनेच्या निकषांनुसार पात्र ठरणाऱ्या महिलांच्याच खात्यात जमा होणार आहे. राज्यातील सुमारे 1 कोटी 66 लाख पात्र महिलांना या हप्त्याचा लाभ मिळण्याची शक्यता आहे. दरम्यान, खात्यात पैसे कधी जमा होणार याची उत्सुकता लाभार्थी महिलांमध्ये आहे. त्यामुळे पुढील काही दिवसांत सरकारकडून अधिकृत अपडेट किंवा हप्त्याची निश्चित तारीख जाहीर होते का, याकडे सर्वांचे लक्ष लागले आहे.
