लोकतंत्र मिरर
मुंबई : आठवड्याच्या पहिल्याच दिवशी मुंबईकरांना पावसाने चांगलेच गाठले. सकाळी कामावर आणि शाळा-कॉलेजांकडे निघालेल्या नागरिकांना अचानक कोसळलेल्या मुसळधार पावसाचा सामना करावा लागला. अनेक ठिकाणी रस्त्यांवर पाणी साचण्यास सुरुवात झाल्याने वाहतुकीचा वेग मंदावला, तर काही भागांमध्ये नागरिकांना सुरक्षित ठिकाणी थांबावे लागले.
हवामान विभागाने पुढील काही तास मुंबई आणि उपनगरांमध्ये पावसाचा जोर कायम राहण्याची शक्यता व्यक्त केली आहे. काही भागांत विजांच्या कडकडाटासह आणि वेगवान वाऱ्यांसह अतिवृष्टीसदृश परिस्थिती निर्माण होऊ शकते, असा इशाराही देण्यात आला आहे. त्यामुळे नागरिकांनी अनावश्यक प्रवास टाळावा आणि आवश्यक असल्यासच घराबाहेर पडावे, असे आवाहन करण्यात आले आहे.विशेषतः पश्चिम उपनगरांतील काही भागांमध्ये पावसाचा प्रभाव अधिक जाणवला. सकाळच्या एका तासातच अनेक परिसरांमध्ये मोठ्या प्रमाणात पावसाची नोंद झाली. वरळी, वांद्रे, जुहू आणि मलबार हिल परिसरात पावसाने जोरदार हजेरी लावत शहराला अक्षरशः झोडपून काढले.
दरम्यान, पावसामुळे कार्यालयीन वेळेत बाहेर पडलेल्या नागरिकांची चांगलीच तारांबळ उडाली. काही ठिकाणी छत्री नसलेल्या नागरिकांनी बसस्थानके, रेल्वे स्थानके आणि इमारतींच्या आडोशाला आसरा घेतल्याचे चित्र दिसून आले. शाळकरी मुलांनाही पावसामुळे अडचणींचा सामना करावा लागला.पालिका प्रशासनाने सखल भागांतील परिस्थितीवर लक्ष ठेवले असून आपत्कालीन यंत्रणा सतर्क करण्यात आल्या आहेत. नागरिकांनी पावसाच्या काळात विजेच्या खांबांपासून, झाडांपासून आणि धोकादायक ठिकाणांपासून दूर राहण्याचा सल्ला देण्यात आला आहे.
मुंबईत मान्सून आता खऱ्या अर्थाने सक्रिय झाल्याचे चित्र असून, येत्या काही तासांत पावसाचा जोर आणखी वाढू शकतो. त्यामुळे मुंबईकरांनी सतर्क राहणे आणि हवामान विभागाच्या सूचनांचे पालन करणे गरजेचे ठरणार आहे.
