लोकतंत्र मिरर
हदगाव (नांदेड). गोवंशीय जनावरांची अवैध वाहतूक करणाऱ्या टोळीवर मनाठा पोलिसांनी मोठी कारवाई केली आहे. हदगाव ते वारंगा रोडवरील मनाठा पाटीजवळ पोलिसांनी सापळा रचून अशोक लेलँड कंटेनर पकडला. या कंटेनरमध्ये तब्बल ७९ बैल अत्यंत निर्दयीपणे दाटीवाटीने बांधून वाहतूक केली जात असल्याचे आढळून आले. ही जनावरे मध्य प्रदेशातून हैदराबाद येथे कत्तलीसाठी नेली जात असल्याची माहिती समोर आली आहे.
गोपनीय माहितीच्या आधारे मनाठा पोलिसांनी ही कारवाई केली. तपासणीदरम्यान कंटेनरमध्ये ७९ गोवंशीय जनावरे आढळली. पोलिसांनी ३० लाख रुपये किमतीचा कंटेनर आणि १८ लाख १२ हजार रुपये किमतीची ७९ जनावरे असा एकूण ४८ लाख १२ हजार रुपयांचा मुद्देमाल जप्त केला आहे.
या प्रकरणी उत्तर प्रदेशातील अमरोहा जिल्ह्यातील हसनपूर तालुक्यातील मोहम्मद बिलाल अजित आणि कौशांबी जिल्ह्यातील गोबिंद अहमद मोहम्मद इसरार (वय ३४) या दोन आरोपींविरुद्ध मनाठा पोलीस ठाण्यात गुन्हा दाखल करण्यात आला आहे.
पोलीस अधीक्षक डॉ. नीलाभ रोहन यांच्या आदेशाने आणि अपर पोलीस अधीक्षक अर्चना पाटील यांच्या मार्गदर्शनाखाली ही कारवाई करण्यात आली. सहाय्यक पोलीस निरीक्षक राष्ट्रपाल लोखंडे, पोलीस उपनिरीक्षक सुदर्शन इंगोले, जमादार रेणुप्रसाद भोपाळकर, शंकर सोनटक्के, रामराव राठोड, अतुल नागरगोजे तसेच मनाठा पोलीस पथकाने या कारवाईत सहभाग घेतला.
या प्रकरणाचा पुढील तपास मनाठा पोलीस करीत आहेत. मनाठा पोलिसांनी केलेल्या या धडक कारवाईचे परिसरातून कौतुक होत आहे.
