लोकतंत्र मिरर
नांदेड (विशेष प्रतिनिधी) : दुष्काळाच्या पार्श्वभूमीवर सरकार सर्वसामान्य नागरिकांच्या पाठीशी खंबीरपणे उभे असून, आगामी काळात पाणीटंचाईची समस्या निर्माण होऊ नये, यासाठी नागरिकांनी पाण्याचा अनावश्यक वापर टाळावा, असे आवाहन नांदेड दक्षिण विधानसभा मतदारसंघाचे आमदार आनंदराव पाटील बोंढारकर यांनी केले आहे.
नांदेड दक्षिण विधानसभा मतदारसंघातील अनेक गावे तसेच नांदेड शहर गोदावरी नदीच्या काठावर वसलेले आहे. त्यामुळे या भागात पाण्याची उपलब्धता राहण्याची शक्यता असली, तरी नांदेड शहराची तहान भागविणाऱ्या विष्णुपुरी जलाशयातील पाणीसाठा कमी होत असल्याने पाण्याच्या नियोजनाकडे गांभीर्याने लक्ष देण्याची गरज आहे. एल निनोच्या संभाव्य संकटाचा सामना करण्यासाठी सरकारकडून सर्वतोपरी प्रयत्न करण्यात येतील. या पार्श्वभूमीवर नांदेड शहरासह ग्रामीण भागात पाणीपुरवठ्याचे योग्य नियोजन करण्याच्या सूचना प्रशासनाला देण्यात आल्या आहेत.
पाण्याचा प्रत्येक थेंब महत्त्वाचा असून, पाण्याचा अपव्यय टाळणे ही प्रत्येक नागरिकाची जबाबदारी आहे. नागरिकांनी पाण्याचा वापर काटकसरीने करावा आणि भविष्यात पाणीटंचाई निर्माण होऊ नये, यासाठी प्रशासनाला सहकार्य करावे, असे आवाहन आमदार आनंदराव पाटील बोंढारकर यांनी केले आहे.
